【晴報專訊】康華前晚在觀塘舉行網上音樂會，邀得阮兆祥和張子丰任嘉賓。康華與祥仔大談出埠工作時遇到的驚險事，康華更曾親睹內地司機慘遭劈傷，令她嚇餐飽。

阮兆祥（右）與張子丰現身支持好友康華。

　　康華與阮兆祥識於微時，康華視祥仔為「救命恩人」：「有次我哋返內地工作，上咗一個四層樓高嘅機動遊戲，因為機件故障落唔返地面，我哋要爬落去。但我有嚴重畏高，好彩祥仔不停安慰我，佢話等佢行先，就算我跌落嚟都係砸死佢，所以印象好深刻。」祥仔謙虛說：「當年我身為師兄，盡量照顧後面嗰班，但彷彿已經係上世紀嘅事。」

康華在內地登台時，曾被男酒客拉落台。

　　提到出埠工作的奇事，祥仔透露曾在日本拍《獎門人》外景，在溫泉酒店被鬼壓：「入房已經唔太舒服，敲門、放鴛鴦拖鞋樣樣做齊，但最後瞓上床都覺得有嘢壓住我。」康華則指登台時，曾遇過男性裝扮的女生當眾向她示愛；她又試過可怕經歷：「我喺內地拍劇，有日拍完外景坐小巴返酒店，但司機唔畀一個臨時演員喺方便位置落車，個臨記竟然call咗一班人嚟劈傷司機，我見到驚到腳都軟。後來每次工作，都會提醒自己對每個人都要有禮貌。」

阮兆祥承諾不再違泊

　　另外，有指祥仔早前疑將座駕停泊在雙黃線，被網民質疑他有特權。祥仔解釋︰「咁小事又提嚟做乜，邊個未停過喺雙黃線呀。不過藝人邊有特權，每個人都有怨氣，睇下發洩喺邊個身上，我唔介意嘅，但當然我咁做係唔啱，以後都唔會再泊喺雙黃線度啦！」康華亦指他這種行為是不正確示範，大家千萬不要效法。