【晴報專訊】吳業坤（坤哥）、黎諾懿及林德信前晚錄影《流行經典50年》，坤哥日前將自己《大醬園》的軍人造型，與韓劇《愛的迫降》玄彬比較，更自封「玄坤」，嚇親一眾「玄太太」。坤哥解釋在疫情下，希望搞笑一番，讓網民開心一下。

吳業坤笑言日前狂煲自己有份演出的《大醬園》解悶。

　　吳業坤笑言今集節目以「男神」為主題，所以忙於準備新劇，也要抽空出席錄影。提到他與型佬王敏德同場，坤哥搞笑說︰「好啱數，我哋係唔同魅力嘅靚仔，我喺兩、三個粉絲心目中都係男神！」

坤哥自信地與玄彬（右）相比，笑言被身邊友人鬧爆。（IG圖片）

　　早前坤哥將自己在《大醬園》的軍官look跟韓國男神玄彬比較，坤哥說︰「我被朋友鬧爆，不過我都係想大家開心下，又咁啱煲緊劇。我覺得我哋都係演軍人，套軍人衫同皮帶扣都幾似。其實大家笑下都幾好，因為（疫情下）日日都好悶。」坤哥將在新劇中，與身材驕人的黃文意演夫妻，他希望彼此擦出火花︰「唔知有無親熱戲，監製話搵我同黃文意做對手，係益咗我。」

黎諾懿自認五音不全

黎諾懿大讚坤哥行可愛開心路線。

　　同場的黎諾懿笑言，一見到坤哥在場，即感覺「男神」定義各花入各眼。他講笑說︰「我個樣贏坤哥，起碼唔使戴眼鏡，年紀同輩份都贏佢，但佢好有才華。」黎諾懿自認五音不全，但要與薛家燕及黃祥興合唱國語歌︰「我本身唱歌都有問題，仲要唱國語歌，真係難上加難。其實無乜必要我都唔唱歌，自己知自己事。」