【晴報專訊】方力申（小方）、張曦雯（Kelly）及諸葛紫岐（Marie）等昨日到沙田馬場出席活動，明日凌晨出戰慈善環島泳的小方，表示訂製特別泳帽出戰，帽上紀錄有意義的事情，但沒有女友名字，笑指因太多女友沒法全部印下去。

方力申為環島泳調整睡眠時間。

　　方力申昨日以短髮新造型現身，提到將挑戰45公里環島泳，他笑說：「就算泳帽甩咗，頭髮都唔會咁阻水。我仲自訂咗泳帽，設計有個『45』，數字入面印咗對我嚟講好有意義嘅事，包括電影名、歌名同母校名。（印女朋友名字？）咁寫唔晒喎，哈哈！」他公布籌款數字已高達510萬元，包括不少藝人的捐款：「我無諗過一個人嘅籌款，可以有咁多人共鳴，好多朋友都話嚟終點等我上水，我又唔係開演唱會，可能上完水講句hi就走，但佢哋都願意等我，好感動。」

　　同場的張曦雯以形象大使身份出席，戴上髮型師朋友為她設計的帽飾。她笑言以往看見其他形象大使如李佳芯、岑麗香的造型很美，今年輪到她出任大使，令她夢想成真。提到投注賽馬，她說：「身邊嘅人會畀貼士，但我唔識投注，又無偏財運。」

諸葛紫岐想追女

諸葛紫岐大讚兩個囝囝乖巧，令她湊仔湊得舒服。

　　此外，諸葛紫岐與老公薛嘉麟拍拖現身，近來甚少出席社交活動的Marie，透露最近忙於照顧兩個寶貝仔。問夫婦會否再追女兒？Marie笑說：「我想生女，但如果追多個都唔係女，咁點算？做媽咪好辛苦，但我又唔想太早講封肚。我發覺單靠食療似乎無咩用，我有朋友生咗四個仔，想靠食療追個女，但結果第五胎都係仔。」