Jenny一直都好支持大家和平表達意見，正所謂香港有言論自由，又有集會自由，無論咩立場都應該好好運用！今日Jenny就見到有班上咗年紀嘅Uncle、Auntie善用佢哋權利，去咗公民黨譚文豪喺樂富嘅地區辦事處抗議，投訴佢「阻差辦公」喎，點知……

　　本身班Uncle、Auntie就擸咗個大聲公，喺譚文豪個地辦門口叫口號，唔知係唔係個位置有啲陰涼，Uncle唔係好睇到份稿上面啲字，所以讀到食晒螺絲咁。有反對佢哋嘅街坊就喺隔離叫囂，話「走啦！」、「樂富唔歡迎你哋呀！」

　　阿叔初頭冇理到，繼續讀。不過投訴唔係應該向本人投就最有效嘅咩？點知譚文豪本尊出到嚟，問「係咪有意見要反映？」，當時在場、有「收工男」之稱嘅傅振中就叫啲示威者「走啦、走啦」。但係片中所見，其實Uncle、Auntie們都唔係好捨得走，仲拎住枝咪瘋狂loop同一句「你嘅支持者全部都係暴民」，「收工男」撳都撳唔住，拉走完一個又有另一個企係到繼續講。

　　見大家咁熱情，譚文豪都邀請佢哋過返去佢地辦公室：「嚟慢慢講慢慢講」、「唔好走唔好走」、「過門都係客，請你哋飲杯寶礦力！」不過寶礦力應該唔啱Uncle、Auntie嘅口味，佢哋應該鍾意飲加多寶多啲，所以最後都係走咗。結果呢個抗議全程僅得8分鐘都冇，唔知佢哋會唔會唔夠喉？唔緊要!得閒下次再來過囉!