新民黨立法會議員容海恩（Eunice）榮升媽媽之後，今日第一次帶B女嚟立法會見下世面，成為今日「景點」，仲成功逗到唔少議員叔叔阿姨嘅利是添！連平時一出場就霸氣側漏嘅葉劉師傅，抱起B女都一秒變溫柔！不得了！

B女成「景點」成功爭取利是多封

　　就咁睇唔夠一個月Eunice已經修身成功，佢話B女今個星期六先滿月，自己本身諗住下星期先復工，今日就實踐承諾帶咗啲自家製薑醋同紅雞蛋嚟派畀同事同行家。期間仲有唔少建制派議員經過嚟偷望B女兼派利是，不過佢地都好識做，眼看手勿動。B女初見世面都好淡定，就算畀一堆人圍觀，加埋周圍充滿傾計聲，都完全冇扭計，大家都忍唔住讚「乖豬！」

英文名仲未改好 要等「三讀通過」

　　Eunice亦都透露，終於為B女改好中文名，就係叫做「袁昌蔚」，希望B女可以茁壯成長、日後可以「幹一番大事」！至於英文名就未有，「要三讀通過先得！」，所以而家都係叫住佢做「阿B」先！

　　雖然身為立法會首個在任結婚生B嘅女議員，Eunice都係冇得帶阿B入會議廳齊齊開會㗎，因為阿B唔係議員同官員，就算係嬰兒都係計入公眾人士。Eunice就笑住咁叫阿B：「要入去就第時自己選入去啦！」果然對阿B好有期望吖吓！

政治BB班等緊你

　　而家啲港媽喺BB未出世就報定幼稚園、N班、Playgroup之類，務求自己個B練成十八般武藝。Eunice又有冇報定幾個先呢？佢就話唔想畀咁多壓力阿B，所以呢啲都未諗住。不過，啱啱先叫完阿B選立會，睇嚟阿B避得過幼稚園、小學，以後都有大把政治訓練班等住佢喇！