• |
  • 極速報價
  • |
  • 會員
  • 產品服務 / 串流版
  • 設定
過往專欄
言歸政傳
言歸政傳政經頑石不低頭為理發聲郎旋風薰香療法男士診症室抵玩自助遊句句有骨星座命理念力•氣功手機應用tips睛益求精嚴浩 LIKE!見微知著跟著陶冬找美食數碼潮人廣告有晴踏出退休第一步識食•惜食有種CEO叫做莊潮爆網事羅湖橋兩邊娛樂酷辣辣思歪思正十萬八千里樂本健‧教室特首選舉趣食60秒入廚101觀自然•觀香港有種生活政本清源心筆在妍維基解碼IT戰國誌煮酒論政今日趣聞馬壇.誌趣星期二周融愛瘋Apps美美道來大國崛起智醒日誌@中小企「營」刃而解Smart Buying甜品工房Education Calculator家事法庭升學信箱新手媽媽怪獸父母營營樂樂親子專題財富非常道謝國忠看勢獨唱團京城近觀原來如此乾坤挪移街坊食神Keyman森巴舞睇波LU文化導遊精神解碼抗癌兵團有營生活吾道崢廣見聞名家名畫商務英語型品薈我心中的米芝蓮歐洲直擊旅途中食得喜Leadership Coaching一哥教攝影心晴百態乳你同行專科專論人愛衣裝Word Discovery科技趨勢愛情故事投資達人政治擂台藝術投資秘笈抗癌點滴寵物情緣淘寶lization電影一線網絡鬼故主.管微博一分鐘管理娛樂有理進攻SAT古今名錶政‧經‧女人The Beauty Factor議會內外石油戰爭男女情色談金說匯風水環境學細味建築健康快車Green Hong Kong星光伴我行我吃過的米芝蓮A+孩子上海觀察京城札記鐵娘駕到食客三千創富新思維海外升學信箱Today's Web藝術投資世界在讀什麼-雷美華潮得起Business English飛越地球村紅酒情報職場物語股場琦手

30/04/2018

白鴿黨「雙重割蓆」 老鴿乳鴿無一倖免

  • 收藏文章
  • Jenny Yin

    Jenny Yin

    於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

    言歸政傳

  「峯搶手機」事件成為政壇大花生,建制派搧行晒風再點幾個火之後就坐定定等食,泛民呢邊就頭痕喇!齋係一句「保定唔保」都唔敢即時講實,連許智峯所屬嘅民主黨都即刻行出來鬧,除咗出聲明讉責之外,仲即時凍結佢嘅黨籍,黨主席胡志偉好早之前就話,為咗避嫌,如果有人提譴責動議,民主黨唔會投票喎!「割蓆」速度之快真係令人嘆為觀止!

 

 

割得快好世界?

 

卿姐一出口 峯仔即獲同情票

 

  身為民主黨嘅元老劉慧卿(卿姐)唔知係唔係因為「退咗位」(冇做議員),喺大家都未知應該「保定唔保」嘅時候,星期四(26日)就已經大大聲咁喪鬧峯仔:「自己整個陷阱出嚟畀自己同(民主)黨去踩」、「佢唔適合留喺民主黨同立會」!講到咁大,咪即係冇彎轉?不過卿姐一講完,Jenny就聽到有唔少泛民支持者由鬧爆峯仔,轉為同情峯仔啦!有朋友仲講笑咁講,唔知係唔係卿姐都知自己仲有啲影響力(唔知係好定壞?),今次犧牲自己救峯仔!

 

  而全體議員都喺星期五(27日)下晝睇完條CCTV片之後,終於都了解咗成件事大概係點。建制派咁難得捉到泛民痛腳,夾埋砌低峯仔之心如一就唔使講喇!而泛民呢邊睇完條片打咗個底,都蒲頭講返兩句「不能接受許智峯的行為」、「予以譴責」,不過公民黨同議會陣線暫時都係對譴責動議表明反對嘅!

 

「予以譴責」VS「譴責動議」

 

  去到呢個位Jenny就要解釋吓,點解佢哋要「予以譴責」同時又唔支持「譴責動議」呢?其實係因為如果有建制提出「譴責動議」,又得到在席議員三分之二贊成嘅話就會通過,而通過咗就唔係淨係鬧峯仔咁簡單,而係要褫奪埋佢個議席。公民黨同議會陣線就覺得峯仔今次雖然係抵鬧,但係就罪不致死,所以就表明反對呢個動議喇!

 

  至於峯仔個「大佬」胡志偉又點反應呢?睇完條片之後,唔知係覺得自己之前口快講錯嘢有機會令民主黨喺港島冇咗個議席、定係睇完條片都覺得峯仔罪不致死,就改口喇!話之前民主黨「會避嫌」嘅意思,係指唔會加入由譴責議案成立嘅調查委員會喎!Jenny聽完都不禁喺心入面:「吓?!」咗一聲。

 

「割」完峯仔「割」卿姐

 

  講到要表決係咪罷免峯仔嘅時候,志偉就話要睇返委員會調查完嘅報告、所有得到嘅證據先做綜合考慮,而家話贊唔贊成DQ峯仔都仲係言之尚早!同日夜晚,民主黨仲發埋聲明,話卿姐雖然係民主黨前主席,但而家已經係普通黨員,佢嘅言論係唔代表民主黨。「割」完峯仔「割」卿姐,老鴿乳鴿都無一倖免,難怪民主黨被人叫「割蓆黨」喇!

 

  話時話,Jenny聽講下個月長洲「太平清醮」嘅飄色巡遊入面,惠海陸同鄉會嘅其中一部飄色車係以「峯搶手機」做主題,有小朋友會以許智峯和劉慧卿扮相出現,唔知到時會唔會拎埋張蓆出嚟「割」畀大家睇呢?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經‧生活App   財智‧健康‧品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生