國慶過咗、中秋過埋、立法會個暑假都完喇！立法會今日開鑼，新會期開始，切燒豬當然唔少得啦！呢隻燒豬記者都有份食㗎，仲極速「沽清」，好彩Jenny最後都食到件啫！

立法會開鑼梁君彥大派開心果

　　今日中午廿幾個議員在立法會大樓齊齊切燒豬。不過，點解好似得黃碧雲一個民主派嘅？數數吓，其餘真係都係建制派。

　　主席梁君彥同Jenny講，買咗5公斤開心果，祝願議員可以開開心心做嘢，新一個立法年度個個議員都可以暢所欲言，但又補咗句「唔好係又講唔係又講」。不過比起剝開心果，Jenny都係鍾意剝花生多啲啫！

Miss Mo咬實何君堯唔放

　　嗱！何君堯嘅「殺無赦」言論，就真係令唔少人剝足個幾禮拜花生喇！梁君彥就話唔評論。之但係，毛孟靜（Miss Mo）又點會放過佢，實行就「殺無赦」言論，提出譴責動議，泛民建制一輪你有你講我有我講互鬧對方無聊之後，下次大會再Battle過！

　　另一邊廂，建制派想話修改立法會大會議事規則噃！而家趁民主派有6個議員被「DQ」先去修改，乘人之危喎！今日下午梁君彥就話，做主席保持中立，要改議事規則，都唔係咩洪水猛獸，只要跟足規矩就得。其實，上年都修改兩次議事規則啦，配合返議會運作，經議事規則委員會商討點處理就比較合適。

波哥連任財委會主席 改議事規則走唔甩？

　　講起改議事規則，財委會選出新立法年度的正副主席，毫無意外地陳健波繼續做主席，睇嚟財委會都好快開波修改議事規則嚕～

　　黃碧雲似乎都心裏有數，今朝去參觀濾水廠嗰時就叫財會主席唔好搞咁多嘢，如果唔係爭拗之下，好多撥款會過唔到。不過，金融界議員陳振英就話，據佢所知，財委會將「兩條腿走路」，修改議事規則將以特別財委會形式進行，應該就唔會影響正常撥款議程。

　　題外話，Jenny今日野生捕獲新上任嘅特首辦特別助理李惠，行家都好似平日做嘢咁圍住佢傾偈講笑，佢就話而家身份唔同咗好多嘢都適應緊，而家主要係同啲議員講返而家轉咗工，唔再係記者啦！