近排社交媒體好興一個話題，話一個人叫咩名個形象會係點，例如叫Richard就係有錢、叫Rocky就係大隻仔之類。而Jenny咁多年來識嘅Pauline，都是一副圓潤福相，仲記得早排政府公布首批副局同政助名單時，Jenny睇緊啲相認緊人之際，就發現又係叫Pauline嘅財經事務及庫務局局長政治助理楊寶蓮面圓圓咁，似乎係行可愛路線噃！點知今日一見真人，Jenny可謂驚為天人，再一次感嘆「有圖冇真相」啊……

Pauline張官方相係咁嘅，Jenny覺得髮型同件衫都累事。

真人高挑瘦削 有圖原來冇真相

 
　　今日財庫局局長劉怡翔就帶咗兩位新人出嚟見吓大家，副局陳浩濂(Joseph)大家就成日都見啦，話晒以前都叫做參加過選舉，又做過區議員，所以都好易認。正當Jenny諗緊隨後現身嘅Pauline應該會係近日最Hit嘅「微胖」身形嘅時候，竟然！竟然！竟然！(很重要所以要說三次)行過嚟嘅係一個高挑嘅身影、一雙長腿不特止，側臉望落仲有少少似唐詩詠添！簡直係同政府官方張相若判兩人！今日Pauline著咗件穩陣端裝嘅Little Black Dress，腳踏三吋高踭鞋，好優雅咁行到鏡頭前同大家打招呼。Jenny作為一個女性都忍唔住要講句「好索啊！」唔怪得好多姊妹都話好憎影證件相啦！你睇，明明一個高挑美女都影到圓碌碌，畀著Jenny一定嬲豬。

今日見到Pauline真人(右一)，一條little black dress同佢高挑嘅身型非常之襯。

精通多國語言 冧掂立法會議員唔係難事？

 
　　可能Pauline一直以來主力做研究工作，唔係咁慣見傳媒，所以表現有少少緊張。當局長回應記者嘅提問時，Pauline一直都好乖咁望住局長講嘢，自我介紹嗰陣都係怕怕醜醜、斯斯文文咁;而同場嘅Joseph顯得淡定好多，仲識望住鏡頭微笑！睇嚟Pauline都係要多啲跟Joseph學吓嘢啦！

　　而劉局長介紹二人嘅職務時，特別讚Pauline係語言方面嘅高材生，梗係啦！佢中、英、日、韓、普都精通，局長外訪翻譯都唔使請，可以幫庫房慳返筆。不過計Jenny話，叻唔叻講嘢都係其次，就好似前日新民黨立法會議員容海恩(Eunice)話齋:「Presentation好緊要，有時內容反而無咁緊要」、「靚女都畀人望多幾眼啦，啱唔啱呀？」Pauline又後生又靚女，相信立法會班議員都唔介意多啲同Pauline見面嘅！你話係咪先？