1︰7嘅戰果，雖然未係結局，因為仲有季軍戰，但巴西人嘅世界盃夢已玩完。完咗之後，又點呢？球隊肯定換走「大菲」，毋須多講。球迷呢？呢樣要傾傾，因為世界盃史首次輸得咁慘，仲要係響主場，球迷們頂得住冇？

拍檔張秀文Sammi賽前賽後兩個樣，可見巴西傷盡球迷心！

　　先講番場4強，響現場目睹巴西哀兵上陣，人人都戴尼馬面具為巴西加油時，頭十分鐘大衞雷斯帶動組織進攻確係頭頭是道，點知一個角球就畀德國打開悶局，跟住黑色六分鐘連失三球，之後一切成世盃史最驚人嘅一幕。

　　巴西點解早失波，攻不銳守不穩，慌失失？相信大家聽到睇到太多偉論，我亦無謂浪費時間。響輸完一球又一球嘅黑moment，唔好話巴西球員魂魄唔齊，球迷亦都唔知點反應，剩係得少數德國fans大呼小叫，好在過多幾分鐘，終有球迷瞓醒高叫「Brazil Brazil......」

　　球迷們都想略盡綿力，結果係上半場輸多粒，0︰5。電視台同事此時開始認真研究緊逃生路線，以防萬一暴動會發生！

　　下半場仍要繼續，巴西以攞番面子為目標，德國半力迎戰，整多兩粒後收夠籌，巴西勉強破蛋收場。如此七個一皮結局，可能真係太天方夜譚，賽後球迷們竟然冇過激反應，或者係太過離譜，一時接受唔到。

　　點都好，當足球王國巴西都可以大敗一場時，其實冇乜邊一隊嘅球迷可以永遠活在象牙塔，隨時應該作好心理準備，贏係好，輸都唔好當世界末日，因為足球世界係冇盡頭嘅，永遠都有下一次機會。

　　巴西人生性樂天又樂觀，呢個性格特點會幫佢哋捱過呢個難關，有日東山再起。希望有日巴西人回頭講番呢段1︰7歷史時當係笑話講，而唔係當悲劇睇！

轉載自晴報