新聞

03/07/2019 11:31

《古臣周記-古臣》金價自6年高位回軟,黃金股點部署好?

  《古臣周記》「習特會」過後,中美之前嘅緊張關係一下子就緩和,全球各地嘅魚缸當然升
一升賀一賀佢。不過,神州以至環球最新一份製造業PMI走樣,未能合符「孖屐」預期,所以
香江呢兩日返嚟都唔敢升得咁急,似乎要上返二萬九呢個關口,好友仲要加把勁。
  「孖屐」風險胃納擴大,之前一直成為資金避難所嘅黃金,其價格自然就要回落返啲,有分
析就話,現時金價喺某啲技術位至為關鍵,如果守到固然升勢持續,但失守就要再試低位,所以
呢個星期阿臣就講一啲黃金股啦!

*金礦股業績參差,金股首選SPDR金ETF* 
  
  現貨金自突破1400美金關口之後,之前曾經一舉上漲升到逾六年高位見1438﹒63
美金,升到咁急除咗因為中美貿易戰為經濟前景帶來不穩,仲受地緣政治風險影響,之前美伊兩
國就差啲開戰。另外,當然都同「孖屐」預期聯儲局今個月會減息有關。不過,隨住頭兩個因素
已經緩和,加上儲局主席鮑叔叔(鮑威爾)早前已經為今個月減息預期降溫,隔晚現貨金已經回
落到1405﹒53美金。分析就話,如果金價之後跌穿1350美金嘅話,可能就要重回跌勢
,所以呢個位缸友要睇緊啲啦。
  黃金此前當炒,一啲金礦股已經跟升,好似招金(01818)、紫金(02899)同山
東黃金(01787)都有唔錯嘅升幅。不過,阿臣睇過佢地嘅基本面,雖然受惠金價,但同時
亦受其他成本等因素影響,以紫金為例,業務除咗黃金之外,仲有其他金屬開採業務,好似銅、
銀等,都會受有關價格浮動影響。再睇埋業績,其實三隻金礦佬成績都幾參差,其中招金成績最
差,不論上年全年定今年首季都出現倒退,盈利分別跌26巴仙同跌逾1巴仙。紫金上年全年就
多賺近17巴仙,但今年首季已經少賺19巴仙。只有山東黃金今年首季純利仍然增長但只有約
半成,所以缸友如果買咗啲金礦佬,就真係要就住嚟炒啊。
  講返貿易戰,花旗國呢邊同神州關係略為緩和,不過就開始起對付歐盟,威脅對歐盟另外
40億美金商品加徵關稅,加上花旗國經濟數據走樣,啱啱上個月製造業活動數據放緩至近三年
低位,所以「孖屐」避險情緒重臨,金價呢排走勢都幾反覆,但都無損投資者對黃金嘅需求。全
球最大嘅黃金上市交易基金SPDR Gold Trust(02840)嘅黃金持有量,截
至周一(1日)數據,就升咗0﹒78巴仙,至800﹒20噸,6月嘅持金量就亦上漲近7巴
仙,唔睇專業投資者,睇全球央行對黃金嘅需求亦十分積極,截至今年四月底,根據世界黃金協
會(WGC)同國際貨幣基金組織(IMF)資料顯示,各央行總黃金儲備34024噸,當月
淨買入量達43噸,按月增長8巴仙;首4個月淨增購207噸,喺2010年以來同期最高。
反映「孖屐」對黃金嘅需求有增無減。
  中美關係時好時壞,加上阿臣覺得侵侵對鮑叔叔嘅態度,隨時成為一隻「黑天鵝」,後市走
勢唔明朗下,缸友有閒錢,買少少黃金都係一個保險嘅選擇,不過金礦股阿臣覺得炒下短線就算
數喇,如果真係中長線睇好金價,就不如買SPDR金ETF(交易所買賣基金)更直接,一來
佢交投量最大,本身亦係世界知名嘅黃金ETF,對散戶嚟講如果要轉身都比較靈活。睇埋公仔
圖,呢隻魚毛上個月走勢承住金價嘅走勢,幾個裂口上成為「金牛股」,最高見過1059銀係
近七年高位,6月份單月升幅達8﹒7巴仙跑贏恆指。近排個勢都幾反覆,曾經落返去十天線嘅
位置(約1031銀),今日又再因為金價反彈再上漲,缸友就睇下嚟緊會唔會回補返上個月上
金牛股嘅裂口(約992至1020銀),如果之後喺呢啲位橫行,缸友咪小注買少少做長線投
資囉!

*渣打重上70關口沽貨淨留金畀守倉*
   
  阿臣上星期五(28日)為防G20峰會嚟個反高潮,加上見到渣打(02888)即使有
回購,股價都無咩起色,所以就喺當日開市以70﹒5銀先沽貨走人,不計手續費有750銀落
袋。另一魚毛金界(03918)已經上返買入價同百天線(約9﹒764銀),走勢唔差,所
以就繼續坐到中期嘅策略,希望做到財息兼收。阿臣現時手頭資金充裕,所以想睇過一陣,恆指
走勢會點走,先再部署買入其他魚毛,暫時只賣不買。

  表列截至7月3日(11:00am止)投資組合表現:
 
  股份      股數     平均買入價      現價       總值
  ----------------------------------------
  港股:
  金界     4000股   9﹒65元     9﹒87元   39480元
  ----------------------------------------
  一周買入╱賣出股份
  ----------------------------------------
  股份       每股作價    數量    計及手續費後金額     盈╱虧
                                   (不計手續費)
  ----------------------------------------
  沽出:
  渣打     70﹒50元   250股    17588元     750元
  ----------------------------------------
  股票市值    : 39480元
  剩餘現金    :112581元
  組合淨值    :152061元
  組合本月收益表現:+ 0﹒79%(截至上月底止組合淨值:150870元)
  組合累計收益表現:+44﹒82%(本金105000元計)(2016年8月開倉)
 
  *數據截至今日11:00am

全新節目《說說心理話》原生家庭對成長有咩影響?改善溝通有計可施?► 即睇

槓桿及反向產品是一種採用衍生工具投資產品。衍生工具主要為期貨或掉期合約。

有別於傳統跟蹤指數的交易所買賣基金,槓桿及反向產品通常稱為「單日」產品,因為它的投資目標是提供相等於相關指數表現特定倍數或特定相反倍數的單日回報。

槓桿產品旨在提供相等於相關指數特定倍數的單日回報,例如,投資者買入一隻兩倍槓桿產品,當指數於某日上升10%,有關兩倍槓桿產品就應提供20%的單日回報。

至於反向產品旨在提供相反於相關指數表現特定倍數的單日回報,例如,投資者買入一隻兩倍反向產品,當指數於某日上升10%,有關反向產品就會錄得20%的單日虧損。

當你持有槓桿及反向產品超過一日,有關產品的回報,與相關指數表現的特定倍數,可能會出現偏離。
專業版
HV2
精裝版
SV2
串流版
IQ 登入
強化版
TQ
強化版
MQ

觀落陰:什麼是觀落陰?人人都可參加地府自由行?遊地獄到底係點?

帶你探索全新主頁!輕鬆探索精選資訊!

全新etnet健康網購 賞維他命D3 (價值$108) 齊齊提升免疫力